ធនាគារពាណិជ្ជបរទេសនៃកម្ពុជា (FTB) និងក្រុមហ៊ុនធានារ៉ាប់រងអាយុជីវិត មេនូឡាយហ្វ៍ ខេមបូឌា (Manulife Cambodia) បានប្រកាសជាផ្លូវការអំពីការចុះហត្ថលេខាបន្តភាពជាដៃគូយុទ្ធសាស្ត្រផ្តាច់មុខរបស់ខ្លួន។ ពិធីនេះធ្វើឡើងក្នុងគោលបំណងពង្រឹងកិច្ចសហប្រតិបត្តិការក្នុងការអភិវឌ្ឍផលិតផល សេវាកម្ម និងដំណោះស្រាយហិរញ្ញវត្ថុប្រកបដោយនវានុវត្តន៍ ដើម្បីផ្តល់អត្ថប្រយោជន៍ជូនដល់អតិថិជន និងអ្នកពាក់ព័ន្ធទាំងអស់។
ការបន្តកិច្ចព្រមព្រៀងភាពជាដៃគូផ្តាច់មុខនេះ ឆ្លុះបញ្ចាំងយ៉ាងច្បាស់ពីការប្តេជ្ញាចិត្តរួមគ្នាយ៉ាងមុតមាំរបស់ស្ថាប័នឈានមុខទាំងពីរ ក្នុងការផ្តល់ជូនអតិថិជននូវដំណោះស្រាយហិរញ្ញវត្ថុដ៏ទូលំទូលាយ។ ដំណោះស្រាយទាំងនេះ មិនត្រឹមតែជួយឱ្យអតិថិជនអាចសម្រេចបាននូវគោលដៅហិរញ្ញវត្ថុរយៈពេលវែងរបស់ពួកគេប៉ុណ្ណោះទេ ប៉ុន្តែថែមទាំងផ្តល់នូវការការពារដ៏រឹងមាំចំពោះអ្វីដែលពួកគេផ្តល់តម្លៃបំផុតនៅក្នុងជីវិត ដូចជាគ្រួសារ អាជីវកម្ម និងអនាគតកូនៗផងដែរ។
តាមរយៈភាពជាដៃគូដែលបានពង្រឹងថ្មីនេះ ធនាគារ FTB និង មេនូឡាយហ្វ៍ ខេមបូឌា នឹងធ្វើការរួមគ្នាយ៉ាងជិតស្និទ្ធក្នុងការបង្កើតកញ្ចប់សេវាកម្មរួមគ្នារវាងធនាគារ និងធានារ៉ាប់រង ដែលមានភាពបត់បែន និងឆ្លើយតបចំតម្រូវការជាក់ស្តែង។ ជាមួយគ្នានេះ ស្ថាប័នទាំងពីរក៏ផ្តោតលើការធ្វើឱ្យការទទួលបានសេវាការពារហិរញ្ញវត្ថុកាន់តែងាយស្រួល រហ័ស និងមានប្រសិទ្ធភាពខ្ពស់ តាមរយៈបណ្តាញចែកចាយដ៏ធំទូលាយរបស់ធនាគារ FTB ព្រមទាំងបន្តផ្តល់សេវាកម្មប្រឹក្សាយោបល់ប្រកបដោយវិជ្ជាជីវៈខ្ពស់ ដើម្បីជួយអតិថិជនក្នុងការរៀបចំផែនការហិរញ្ញវត្ថុប្រកបដោយភាពកក់ក្តៅ។
