ធនាគារអាមេរិក Erebor ដែលជាធនាគារផ្តោតលើបច្ចេកវិទ្យា និងនវានុវត្តន៍ហិរញ្ញវត្ថុ បានបង្ហាញចំណាប់អារម្មណ៍ក្នុងការស្វែងរកឱកាសសហការក្នុងវិស័យហិរញ្ញវត្ថុនៅកម្ពុជា និងបានបញ្ជាក់ពីការយកចិត្តទុកដាក់លើការគ្រប់គ្រងហានិភ័យ និងការអនុលោមតាមបទប្បញ្ញត្តិ។
នេះបើតាមរយៈជំនួបរវាង លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា ក្នុងឱកាសអនុញ្ញាតឱ្យលោក Jacob Hirshman សហស្ថាបនិក ធនាគារអាមេរិក Erebor ដែលជាធនាគារផ្តោតលើបច្ចេកវិទ្យា និងនវានុវត្តន៍ហិរញ្ញវត្ថុ ចូលជួបសម្តែងការគួរសមនិងពិភាក្សាការងារ កាលពីថ្ងៃទី១៤ ខែតុលា ឆ្នាំ២០២៦។
ក្នុងជំនួបនេះ លោក Jacob Hirshman បានជម្រាបជូនពីវឌ្ឍនភាពប្រតិបត្តិការរបស់ធនាគារ Erebor នៅសហរដ្ឋអាមេរិក និងគំរូអាជីវកម្មរបស់ធនាគារនេះ ដែលផ្តោតលើបច្ចេកវិទ្យាហិរញ្ញវត្ថុ។ លោកក៏បានបង្ហាញចំណាប់អារម្មណ៍ក្នុងការស្វែងរកឱកាសសហការក្នុងវិស័យហិរញ្ញវត្ថុនៅកម្ពុជា និងបានបញ្ជាក់ពីការយកចិត្តទុកដាក់លើការគ្រប់គ្រងហានិភ័យ និងការអនុលោមតាមបទប្បញ្ញត្តិ។
ជាការឆ្លើយតប លោកជំទាវទេសាភិបាលបានស្វាគមន៍ចំពោះការចាប់អារម្មណ៍របស់ធនាគារ Erebor មកលើទីផ្សារកម្ពុជា និងបានលើកឡើងពីវឌ្ឍនភាពនៃការអភិវឌ្ឍប្រព័ន្ធទូទាត់ឌីជីថល និងហេដ្ឋារចនាសម្ព័ន្ធហិរញ្ញវត្ថុ ដែលសម្រួលដល់ការធ្វើនវានុវត្តន៍ហិរញ្ញវត្ថុប្រកបដោយការទទួលខុសត្រូវ។ ជាមួយគ្នានេះ លោកជំទាវក៏បានសង្កត់ធ្ងន់ពីសារៈសំខាន់នៃការបង្កើតបរិយាកាសអំណោយផលសម្រាប់គាំទ្រដល់នវានុវត្តន៍ហិរញ្ញវត្ថុ ការអនុលោមតាមបទប្បញ្ញត្តិ និងការរក្សាស្ថិរភាពហិរញ្ញវត្ថុ។
លោកជំទាវទេសាភិបាល និងលោក Jacob ក៏បានលើកឡើងពីការបន្តការពិភាក្សា និងផ្លាស់ប្តូរយោបល់បន្ថែមទៀតនាពេលខាងមុខ ផងដែរ។
