ស្ថាបនិក និងជានាយកប្រតិបត្តិក្រុមហ៊ុន Meta លោក Mark Zuckerberg បានផ្តួលស្ថាបនិកក្រុមហ៊ុន Amazon លោក Jeff Bezos ពីតំណែងអ្នកមានដាច់គេបំផុតលំដាប់ទីពីរនៅលើពិភពលោក ដោយទ្រព្យសម្បត្តិរបស់លោក Zuckerberg បានកើនដល់ ២១២ពាន់លានដុល្លារ ខណៈទ្រព្យសម្បត្តិលោក Bezos ស្ថិតនៅ ២០៩ពាន់លានដុល្លារ។ នេះបើតាមរបាយការណ៍ពី Bloomberg billionaires Index ។
លោក Zuckerberg ទទួលបានចំណូលប្រមាណ ៨៤៦លានដុល្លារបន្ថែម កាលពីថ្ងៃចន្ទ ទី៥ ឧសភា កន្លងទៅ ខណៈដែលលោក Bezos បែរជាធ្លាក់ចុះអស់ទ្រព្យសម្បត្តិដល់ទៅ ២.៩០ពាន់លានដុល្លារទៅវិញ។ ការប្រែប្រួលបែបនេះ កើតឡើងដោយសារតែ ភាគហ៊ុនរបស់ក្រុមហ៊ុន Meta បានហក់ឡើងលើស១៦% កាលពីខែមុន ហើយចំណែកឯភាគហ៊ុនរបស់ Amazon កើនឡើងបានត្រឹមតែ ៦.៣៣% នៅអំឡុងរយៈពេលដូចគ្នា។
សូមជម្រាបថា នាយកប្រតិបត្តិក្រុមហ៊ុន Tesla និង SpaceX លោក Elon Musk នៅតែបន្តគ្រងម្កុដ ជាមហាសេដ្ឋីមានដាច់គេបំផុតនៅលើលោកដដែល ដោយទ្រព្យសម្បត្តិរបស់បុរសសម្បូរស្នេហ៍កូនច្រើនរូបនេះ មានចំនួនដល់ទៅ ៣៣១ពាន់លានដុល្លារ៕
