លោក តូច ចៅចេក ប្រធាននាយកប្រតិបត្តិនៃធនាគារប្រៃសណីយ៍កម្ពុជា នឹងចូលរួមក្នុងវេទិកាអន្តរជាតិ «Black Swan Summit Cambodia 2026 (BSSC26)» ក្នុងនាមជាវាគ្មិនកិត្តិយសមួយរូប នៅក្នុងកិច្ចពិភាក្សា ក្រោមប្រធានបទ៖«ក្រុមមនុស្សភាគច្រើនដែលត្រូវបានគេមើលរំលង៖ ការរៀបចំសេវាហិរញ្ញវត្ថុសម្រាប់សេដ្ឋកិច្ចក្រៅប្រព័ន្ធ – The Missing Majority: Designing Finance for Informal Economies» នៅថ្ងៃទី១៥–១៦ ខែវិច្ឆិកា ឆ្នាំ២០២៦។
កិច្ចពិភាក្សានេះនឹងផ្តោតលើការស្វែងយល់អំពីវិធីសាស្ត្រដែលគ្រឹះស្ថាន ហិរញ្ញវត្ថុអាចបំពេញតម្រូវការរបស់អ្នកប្រកបរបររកចំណូល ក្នុងសេដ្ឋកិច្ចក្រៅប្រព័ន្ធ និងសហគមន៍ដែលមិនទាន់ទទួលបានសេវាហិរញ្ញវត្ថុគ្រប់គ្រាន់ តាមរយៈការផ្តល់ដំណោះស្រាយហិរញ្ញវត្ថុប្រកបដោយបរិយាបន្ន ការទូទាត់ឌីជីថល និងការអភិវឌ្ឍផលិតផលហិរញ្ញវត្ថុប្រកបដោយនវានុវត្តន៍ ដែលឆ្លើយតបទៅនឹងលក្ខណៈនៃលំហូរចំណូលមិនទៀងទាត់របស់អតិថិជន។
ដោយផ្អែកលើបទពិសោធន៍របស់ធនាគារប្រៃសណីយ៍កម្ពុជា ក្នុងវិស័យធនាគារនៅកម្ពុជា លោក តូច ចៅចេក នឹងចូលរួមផ្លាស់ប្តូរទស្សនៈ និងចែករំលែកបទពិសោធន៍ជាមួយថ្នាក់ដឹកនាំ និងអ្នកជំនាញក្នុងវិស័យហិរញ្ញវត្ថុ ដើម្បីពិភាក្សាអំពីការពង្រីកបរិយាបន្នហិរញ្ញវត្ថុ ការកសាងទំនុកចិត្តរបស់អតិថិជន និងការបង្កើតដំណោះស្រាយហិរញ្ញវត្ថុប្រកបដោយចីរភាព ដែលឆ្លើយតបនឹងតម្រូវការរបស់សេដ្ឋកិច្ចទាំងមូល៕
