សមាគមធនាគារនៅកម្ពុជា បាននាំយកទស្សនវិស័យរបស់កម្ពុជាទៅកាន់កិច្ចពិភាក្សាថ្នាក់តំបន់ ស្តីពីអនាគតនៃអាជីវកម្មប្រកបដោយចីរភាព

សមាគមធនាគារនៅកម្ពុជា បានចូលរួមចំណែកក្នុងកម្មវិធី Forward Faster Now | APAC 2026 នៅទីក្រុងកូឡុំបូ ប្រទេសស្រីលង្កា ដោយបាននាំយកទស្សនវិស័យរបស់កម្ពុជាទៅកាន់កិច្ចសន្ទនាថ្នាក់តំបន់ រួមជាមួយថ្នាក់ដឹកនាំធុរកិច្ចមកពីទូទាំងតំបន់អាស៊ីប៉ាស៊ីហ្វិក ស្តីពី ឥទ្ធិពលនៃចីរភាពក្នុងការពង្រឹងការប្រកួតប្រជែង និងការរីកលូតលាស់រយៈពេលវែងរបស់អាជីវកម្ម។

លោក រ័ត្ន សោភ័ណ ប្រធានសមាគមធនាគារនៅកម្ពុជា បានចូលរួមក្នុងកិច្ចពិភាក្សាជាន់ខ្ពស់ ក្រោមប្រធានបទ «ធុរកិច្ចមានវឌ្ឍនភាពកាន់តែឆាប់រហ័ស៖ ភាពជាអ្នកដឹកនាំរបស់នាយកប្រតិបត្តិក្នុងបរិបទបច្ចុប្បន្ន និងទៅអនាគត» (Forward Faster Business: CEO Leadership in Today and for Tomorrow) រួមជាមួយថ្នាក់ដឹកនាំធុរកិច្ចក្នុងតំបន់ ដើម្បីចែករំលែកទស្សនវិស័យលើវិធីដែលស្ថាប័នអាចវិវត្តន៍ខ្លួន សម្របទៅតាមបរិយាកាសធុរកិច្ចដែលកាន់តែស្មុកស្មាញ ដើម្បីបង្កើតគុណតម្លៃរយៈពេលវែងប្រកបដោយចីរភាព។

ក្នុងកិច្ចពិភាក្សានេះដែរ លោក សោភ័ណ ក៏បានចែករំលែកនូវទស្សនវិស័យយ៉ាងច្បាស់លាស់ថា៖ ចីរភាពត្រូវតែជាមូលដ្ឋានគ្រឹះសម្រាប់ការគិតគូរអំពីការរីកលូតលាស់ ភាពធន់ និងការបង្កើតតម្លៃរយៈពេលវែង។ កិច្ចពិភាក្សានៅទីក្រុងកូឡុំបូ ក៏ឆ្លុះបញ្ចាំងពីបេសកកម្មដែលកំពុងលេចចេញជារូបរាងនៅក្នុងប្រទេសរបស់យើងផ្ទាល់៕